Die wenners van die Lagoon-rolbalklub op Langebaan se Somersakeliga is gisteraand (Donderdag 16 Oktober) gekroon, ná ʼn strawwe eindronde.
Twaalf spanne het dit uitgespook, met PJ Toilets wat Headline Blinds met ʼn verblindende 27-2 punte geklop het om as algehele wenner uit die stryd te tree. Headline Blinds neem die tweede plek in.
Die top-ses wenners in elke afdeling – Afdeling 1 wat die aflope maande op Dinsdagaande teen mekaar gespeel het, en Afdeling 2, wat dit op Donderdagaande uitgespook het – het die eindronde gehaal.
Die sakeliga het begin met 26 spanne. In die eindronde het ʼn span uit elke afdeling dit teen ʼn span van die ander afdeling dit uitgespook vir derde, vyfde, sewende, negende en elfde plek.
Die uitslae is as volg:
- Copy & Paste het teen verwagtinge in Eco Sport met 18-9 gewen om derde te eindig
- Die span van Boesmanland-slaghuis het vyfde geëindig deur Magic Services te wen met 16-8 punte.
- Alu Station en Hyundai is gesamentlik sewende, elk met 12 punte.
- Rolling Rebels het negende geëindig deur Tweede Kans met 11-9 te klop.
- MJ Geomatic het Comtel met 16-12 gewen en daarmee elfde geëindig.
Tiaan van Wyk, Gabrielle Van Wyk, Ryen Etzebeth , Monique Large en Herman van Lill (sakeliga-sameroeper). Foto: Alida Buckle
Volgens die organiseerders was die sakeliga so gewild dat die spelers van die 26 spanne nie wou gehad het die liga moet eindig nie.
Die sakeliga gee die Lagoon-rolbalklub ʼn geldelike hupstoot om onder meer die gronde op te knap en in stand te hou, maar belangriker is die aankweek van ʼn liefde vir die sport.
Vir die klublede is dit lekker om aan die begin van elke sakeliga die nuwelinge touwys te maak en die fynere kunsies en tegnieke aan te leer. Die reëls moet ook verduidelik word.
“Teen die derde aand kan ons maar terugstaan, dan weet almal wat om te doen,” het Herman van Lill, sameroeper van die sakeliga, gesê.
Die volgende sakeliga vind in die eerste kwartaal van 2026 plaas. Datums sal nader aan die tyd deurgegee word.
HIer is van die aksiefoto’s geneem deur Alida Buckle.
*Indien jy van die foto’s wil aflaai en aanstuur, gee asseblief net erkenning aan Weslander om die redaksie se harde werk en die tyd wat spandeer is om dié geleentheid by te woon, te respekteer.
You must be logged in to post a comment.