Maak Marinda Engelbrecht van Marinda Kook se heerlike skelvis-pastei:
Bestanddele
1,2 kg skelvis (haddock)
6 swartpeperkorrels
750 ml melk
Kaassous
125 ml botter
125 ml koekmeel
750 ml melk (Gebruik die melk waarin jy die vis gekook het. As dit te min is, vul dit aan.)
250 ml gerasperde kaas
2,5 ml mostertpoeier
sout en peper
Kapokaartappels
5 groot aartappels, gekook
125 ml warm melk
90 ml botter
sout en peper
rooipeper, opsioneel om
bo-oor te strooi
Metode
Kook die vis in die melk met die peperkorrels totdat dit gaar is. Haal dit uit die melk (hou die melk vir kaassous) en vlok die vis.
Gooi die peperkorrels weg.
Kaassous
Smelt die botter in ‘n potjie.
Roer die meel met ‘n draadklitser by.
Gooi die melk (wat eenkant gehou is) by en roer met die draadklitser totdat dit glad is.
Laat dit prut vir vyf minute.
Proe en gooi sout en peper na smaak by.
Roer die kaas by.
Pastei
Roer die gevlokte vis by en skep in ‘n oondbak.
Maak die kapokaartappels deur die botter en warm melk by die warm aartappels in te roer. Druk lekker fyn met ‘n fyndrukker.
Gooi sout en peper na smaak by. Skep oor die vis in die oondbak en sprinkel rooipeper oor – as jy van ‘n bietjie brand hou.
Bak vir 30 minute by 180 grade Celsius.
•Weslander nooi graag ons lesers om hul gunsteling- resepte, wat al die toets van tyd deurstaan het, saam met ‘n foto van die dis vir moontlike publikasie in te stuur na weslander@novusmedia.co.za
