Vanjaar het die Saldanhabaai-munisipaliteit (SBM) die hoogste plek behaal in die munisipale afvalbestuur se erkenningsprogram (MWMRP), wat deur die departement van omgewingsake en ontwikkelingsbeplanning bestuur word.
Hierdie prestasie beklemtoon die munisipaliteit se volgehoue toewyding aan doeltreffende afvalbestuur en volhoubare omgewingspraktyke. Erkenningsertifikate is op 15 Augustus aan die top-drie munisipaliteite by die Afvalbestuursbeamptesforum oorhandig. Dié prestasie erken SBM as ’n toonaangewende voorbeeld van uitmuntende afvalbestuurspraktyke in die streek.
Vir die jaar 2023 het SBM ook die hoogste plek behaal en in 2022 met ’n telling van 83% het SBM die derde plek behaal. Die munisipaliteit het hierdie jaar aansienlike vordering gemaak en sy telling verhoog na ’n indrukwekkende 90% om die eerste plek te verower. Hierdie prestasie weerspieël ’n goed gekoördineerde en strategiese benadering tot afvalbestuur en is sterk betwis deur ander top-munisipaliteite in die Wes-Kaap, met Overstrand in die tweede plek (89%) en Drakenstein in die derde plek (85%).
Die MWMRP-evaluering het ’n breedvoerige assessering behels van sleutelgebiede soos afvalbestuursleierskap, strategiese beplanning, volhoubaarheid van dienste, akkuraatheid van data, nakoming van regulasies, en gemeenskapsbetrokkenheid in afvalvermindering.
Saldanhabaai se prestasie ten opsigte van dié aspekte is te danke aan hul proaktiewe benadering en toewyding aan die verbetering van lewensgehalte vir inwoners deur verbeterde afvalbestuursdienste.
David Wright, senior bestuurder vir grootmaat water en vaste afval by Saldanhabaai-munisipaliteit, het sy trots uitgespreek oor die span se prestasie. “Ons is uiters trots op hierdie erkenning. Dit is ’n bewys van die harde werk en samewerking van ons hele span. Ons het gewys dat, deur saam te werk en gefokus te bly, ons buitengewone resultate kan behaal.”
Hy bedank ook graag die gemeenskap vir hul omgewingsbewustheid en deelname aan die programme. “Daar is egter altyd ruimte vir verbetering, en ons het die gemeenskap se hulp nodig om onwettige storting te bekamp en effektief gebruik te maak van ons dienste, sodat ons saam die Saldanhabaai-gebied skoon kan hou.”
