‘n Reuse vonds Mandrax-tablette ter waarde van sowat R7,56 miljoen is op ‘n plaas buite Vredenburg gekry.
Die Valke het die vonds, gereken as die grootste nog op die Weskus, Maandagaand 28 November tydens ‘n klopjag gekonfiskeer.
Vier mans, drie van Gauteng en een van Vredenburg, is ook in die klopjag, wat om 19:20 plaasgevind het, in hegtenis geneem.
Volgens kol. Jakkie von Litsenborgh, adjunkhoof van die Vredenburg-polisiegroep, sal die mans Woensdag, 30 November in die Vredenburg-landdroshof op aanklagte van dwelmhandel verskyn. Die kanse is blykbaar groot dat die saak na die Kaapse Hooggeregshof verwys kan word.
Meer as 168 000 tablette, sowel as die trok waarmee die dwelms vervoer is, is gekonfiskeer.
Die verdagtes het voorgegee dat hul matrasse met die trok vervoer. Die dwelms is in ‘n versteekte paneel voor in die trok gevind.
Von Litsenborgh beweer dit wil voorkom asof die Gautengse dwelmsindikate nou plattelandse dorpe teiken om hul dwelms in die Kaapse skiereiland te versprei.
“Hierdie is sweerlik een van die grootste dwelmvondse wat nog in die Weskus gemaak is,” het Von Litsenborgh oor die sukses gesê.
