Met net ‘n paar weke oor voordat die
2025-matriekleksamen begin, doen die Wes-Kaapse Onderwysdepartement (WKOD) ‘n beroep op alle kandidate om seker te maak dat hulle vertroud is met die reëls van die eksamen.
David Maynier, die Wes-Kaapse
minister van onderwys, het gesê elkeen van die matriekkandidate word gevra om twee sleuteldokumente te onderteken – ‘n matriekbelofte en ‘n verbintenisooreenkoms.
Die matriekbelofte is ‘n dokument wat deur die kandidate onderteken moet word en waarin hulle belowe om hulself aan hul studies vir hul eksamens te wy en hul bes te doen om die reëls van die eksamens te volg en enige oortreding van die reëls waarvan hulle bewus word, aan te meld.
Die verbintenisooreenkoms spel die reëls in detail uit, sowel as die gevolge van die oortreding daarvan. Dit word deur die kandidaat sowel as hul ouer of voog onderteken, sodat albei partye erken dat hulle bewus is van die reëls en die gevolge. Die dokument lys ook die verskeie verantwoordelikhede van sowel die kandidaat as hul ouers.
Maynier het matrieks aangespoor om hierdie dokumente ernstig op te neem en te verseker dat hulle die inhoud in detail gelees het en verstaan en gesê die gevolge van die oortreding van die eksamenreëls is ernstig.
“Die kandidaat se uitslae kan nietig verklaar word en hulle kan selfs verbied word om tot drie daaropvolgende eksamens te skryf, wat hul naskoolse werk of opleiding vertraag.
“As ‘n kandidaat by die uitlek van enige eksamenvraestel betrokke is, kan hulle selfs strafregtelike vervolging in die gesig staar. Altesaam 19 kandidate is in die 2024-matriekeksamen vir die besit van notas of selfone gediskwalifiseer. Bedrog is eenvoudig nie die risiko werd nie.”
Maynier het bygevoeg dat elke kandidaat sy of haar sakke noukeurig moet nagaan vir notas of selfone voordat hulle gaan sit om te skryf, aangesien “vergeet” dat hulle hierdie items saamdra, ongelukkig nie ‘n verskoning is nie.
“Ons doen ‘n beroep op ons kandidate om die oorblywende tyd voor die
eksamen wyslik te gebruik en ons wens hulle alle sterkte toe terwyl hulle hul finale voorbereidings tref.”
