Lede van die junior stadsraad het onlangs handboeke aan Hoërskool Louwville oorhandig.
Die handboekprojek is die inisiatief van Anneen Uys, junior onderburgemeester van die Saldanhabaai-munisipaliteit, en is in die middel van verlede jaar van stapel gestuur.
Uys se portefeulje by die junior stadsraad is akademiese aktiwiteite.
Sy het verlede jaar met haar handboekprojek begin en tot dusver 10 bokse boeke by Hoërskool Louwville gaan aflewer.
Die boeke is alles deur onderwysers en leerders van verskeie skole geskenk. Sy het oral gevra, ook op sosiale media, mense moet hul ou handboeke skenk.
“Ek het verlede jaar besef daar is ’n dringende nood aan handboeke vir hoërskoolleerders. Die meeste mense bêre hul ou handboeke in die kas en vergeet daarvan terwyl ander leerders dit kan benut.
“Die doel van dié projek is om dié leerders wat graag akademies wil presteer, maar nie die hulpbronne en omstandighede het om dit te doen nie, te ondersteun. As ons saam staan en mekaar ondersteun kan ons die wêreld verander,” het Uys gesê.
Handboeke sal ook aan Hoërskool Diazville oorhandig word.
