Thys Louw
Die somer bring sonskyn en buitelewe, maar dit hou ook ernstige uitdagings vir honde in. Anders as mense kan honde nie doeltreffend afkoel deur te sweet nie en raak hul liggame vinnig oorverhit. Dit kan binne minute lewensgevaarlik word. Elke eienaar behoort te weet hoe hitte ‘n hond beïnvloed, watter tekens as ‘n waarskuwing dien en hoe om vinnig op te tree.
Honde het min sweetkliere – meestal in hul pote – en maak staat op hyg om af te koel. Wanneer hulle vinnig asemhaal, verdamp vog deur die tong, mond en lugweë, wat tot ‘n beperkte mate van verkoeling lei. In baie warm of vogtige toestande werk hierdie stelsel swak en kortneus-rasse soos boel- en mopshonde het besondere moeite met asemhaling en afkoeling.
‘n Hond se normale liggaamstempera- tuur is tussen 38 en 39 °C. As dit 41 °C of hoër bereik, begin organe faal.
Een van die gevaarlikste situasies ont-
staan wanneer ‘n hond in ‘n stilstaande motor agtergelaat word. Selfs met oop vensters kan die temperatuur binne minute gevaarlik hoog styg. Op ‘n dag van 30 °C kan die hitte binne tien minute tot meer as 40 °C klim. Omdat honde nie kan sweet nie, oorverhit hulle vinnig. Elke jaar sterf diere wêreldwyd weens hitteblootstelling in voertuie – selfs wanneer die eienaar glo dit is net vir ‘n kort rukkie.
Warm oppervlaktes is nog ‘n risiko. Teer, sement of teëls wat lank aan die son blootgestel is, kan 20 tot 30 grade warmer as die lugtemperatuur word. By 32 °C kan ‘n teeroppervlakte dus 52 tot 60 °C bereik – warm genoeg om binne sekondes brandwonde aan ‘n hond se pote te veroorsaak. ‘n Praktiese toets is om self die handpalm vir tien sekondes op die oppervlak te hou; as dit vir jou te warm is, is dit ook vir die hond te warm – en gevaarlik.
Tekens van oorverhitting sluit in oormatige hyg of kwyl, rooi of bleek tand- vleis, lusteloosheid, wankelrige beweging, braking of diarree. In ernstige gevalle kan aanvalle of bewusteloosheid voorkom.
Wanneer enige van hierdie simptome verskyn, moet die hond onmiddellik na ‘n koeler plek geneem, met koel (nie ysige) water natgemaak en so gou moontlik na ‘n veearts geneem word.
Honde kan op verskeie eenvoudige maatreëls teen hitte beskerm word:
• Moet nooit ‘n hond in ‘n motor los nie – nie eens vir net ‘n kort rukkie nie.
• Vermy oefening tydens die warmste tye van die dag; stap eerder vroegoggend of laatmiddag.
• Gaan die grondtemperatuur na voordat jy met jou hond buite stap.
• Verskaf altyd vars, koel water en toegang tot skaduwee.
• Gebruik koelmatjies of nat handdoeke
waarop honde tydens warm dae kan lê.
• Wees ekstra versigtig met rasse wat moeiliker asemhaal.
Hitte-uitputting kan voorkom word deur sorg en waaksaamheid. As iemand ‘n hond in ‘n geslote voertuig sien, moet hulp dadelik ontbied word. Optrede kan ‘n lewe red.
