Polisiebeamptes wat Sondagmiddag 3 November ’n klagte by ’n huis in Diazville, Saldanha, opgevolg het, is deur ’n grusame gesig begroet – ’n lyk toegedraai in swart sakke.
Geo Jason Arends (24) is vermoedelik vermoor in wat blyk ’n boendoehofmoord in voortslepende geweld in dié dorp te wees.
Volgens die Weskus-polisie se distrikskantoor het altesaam ses mense, onder wie vyf vroue, Dinsdag 5 November in die Vredenburg-landdroshof op aanklag van moord verskyn.
Arends se lyk is Sondag omstreeks 17:10 in die motorhuis gekry.
Ooggetuies beweer glo die oorledene is aangerand omdat inwoners hom daarvan verdink het dat hy “wou inbreek”.
Die Saldanha-polisie ondersoek die saak.
