Sea Harvest het weer eens ‘n rommelvanger geïnstalleer om te verhoed dat besoedelingstowwe deur die stormwaterdrein langs die Hoedjiesbaai-hotel in Saldanhabaai in die see beland.
Die vanger is die derde wat die maatskappy op dieselfde drein geïnstalleer het – die eerste kon nie die druktoename tydens storms weerstaan nie en die tweede is kort ná installasie gevandaliseer. Die geld vir die nuwe vanger is deur die Sea Harvest-stigting beskikbaar gestel – ‘n organisasie sonder winsoogmerk waardeur die maatskappy plaaslike gemeenskapsinisiatiewe ondersteun.
“Sea Harvest is vasberade as ‘n sakeonderneming; is in Saldanhabaai belê en is daartoe verbind om verantwoordelik op te tree en die omgewing te beskerm. Dit beteken dat ons ons rol as bewaarders van die omgewing baie ernstig opneem,” sê Terence Brown, die hoof van Sea Harvest en voorsitter van die stigting.
“Daarom, terwyl die mislukking van die eerste ontwerp en die diefstal van die tweede vanger baie ontmoedigend was, het ons dit as ‘n uitdaging gesien om ‘n nuwe en verbeterde oplossing te vind.”
Brown gee die krediet aan een van die maatskappy se interns, Philani Makhebela, ‘n meganiese ingenieur, vir die ontwikkeling van die verbeterde ontwerp.
“Ons het die uitdaging aan Philani voorgelê en ons is baie trots op wat hy bereik het. Hy het met verskeie belanghebbendes saamgewerk, insluitend ‘n waardevolle leerervaring met Norsenet, om die vangtoestel te installeer, wat stewiger en minder beweeglik is, maar ook ontwerp is vir maklike skoonmaak, wat dit meer prakties maak vir langtermyn-monitering. Hoewel dit nog die toets van die tyd moet deurstaan, is ons hoopvol dat die vanger die werk sal doen waarvoor dit ontwerp is.”
André Truter, die burgemeester van die Saldanhabaai-munispaliteit, moedig inwoners en besoekers aan om die lokval te inspekteer wanneer hulle by die strand van Hoedjiesbaai is en om enige probleme van vandalisme by die munisipaliteit aan te meld.
“Ons is baie dankbaar teenoor Sea Harvest en sy sakevennote. Die sukses van die vanger vereis egter ‘n gemeenskapspoging. Die optimale oplossing is om rommel by die bron te stop voordat dit ons riviere en oseane bereik.”
Die Sea Harvest-stigting is die afgelope drie jaar by ‘n ander projek om rommel te bekamp, betrokke. Dit betrek plaaslike skole deur ‘n Asblik-tot-
skat-projek, onderrig leerders en bemagtig skole om rommel in skatte om te skep.
