Wanneer dit koud raak, verander alles – ook jou troeteldier se liggaam. Net soos mense meer eet in die winter of lus raak vir warm kos, het diere ook ander voedingsbehoeftes wanneer temperature daal. Dit is een van die belangrikste, maar dikwels misgekykte aspekte van goeie dieresorg in koue weer.
In die koue moet die liggaam harder werk om warm te bly. Diere, veral dié wat buite bly of slaap, gebruik meer energie om hul liggaamstemperatuur konstant te hou.
As jou hond of kat nie genoeg eet nie, begin die liggaam spiermassa afbreek vir hitte en brandstof. Gewigsverlies word dalk nie dadelik opgemerk nie, maar diere raak lam, lomerig en stadig – alles tekens van onvoldoende voeding. Diere wat te min eet, kan ook makliker siek word omdat hul immuunstelsels verswak.
Hoeveel om te voer
Elke dier is anders – grootte, ras, ouderdom en aktiwiteitsvlak speel ‘n rol – maar daar is ‘n eenvoudige reël in die winter: “Eet bietjie meer, maar nie verkeerd nie.”
Honde wat buite slaap, het sowat 10–20% meer kalorieë nodig as gewoonlik. Katte, veral dié wat nie jag of baie beweeg nie, het dalk net effens meer kos nodig, maar wel van goeie gehalte.
Ou of ondergewig diere moet versigtig gevoer word, verkieslik kleiner hoeveelhede meer gereeld.
Let op: Dit beteken nie jy moet sommer net meer gee van dieselfde goedkoop hondekos nie. Die gehalte van voeding is nou selfs belangriker as die hoeveelheid.
Wat is goeie wintervoeding?
Konsentreer op kos wat energieryk en voedsaam is. Kyk uit vir die volgende:
• Proteïen – Help met spierinstandhouding en hitteproduksie.
• Goeie vette – Dit help met energie én ‘n gesonde pels.
• Gekookte bykosse – ‘n bietjie gekookte hoender sonder been, gekapte groente soos wortels of rys kan ‘n goeie byvoeging wees vir honde. (Geen uie, sout of speserye asseblief).
• Warm kos – Indien moontlik, sit kos voor wat nie yskoud is nie. Selfs net ‘n bietjie warm water oor droë brokkies help.
Moenie ongeskikte kosreste of tafel-afval vir jou troeteldier voer nie – dit bevat dikwels sout, speserye of bestanddele wat hul gesondheid kan benadeel.
Lewenslyn in winter is water
Honde drink miskien minder water in die winter, maar skoon water is steeds belangrik.
Water is noodsaaklik vir vertering, temperatuurbeheer en die uitskeiding van gifstowwe. In koue weer is daar ‘n groter risiko dat water vries, vuil word of eenvoudig nie beskikbaar is nie, omdat mense dit nie so gereeld aanvul soos in die somer nie.
Wenke vir water:
• Voorkom dat water vries – sit water in ‘n bakkie wat nie metaal is nie, of plaas dit op ‘n plek wat effens beskut is teen koue wind.
• Hou dit skoon – vervang water minstens twee keer per dag.
• Groot honde drink baie – gebruik ‘n stewige houer wat nie maklik omval nie.
‘n Troeteldier sonder toegang tot vars water is ‘n dier wat makliker dehidreer, veral as hulle meer eet en hul liggaam harder werk om warm te bly.
Gee byvoedings
Dis ‘n werklikheid dat baie gesinne nie die duurste troeteldierkos kan koop nie, maar daar is steeds slim en verantwoordelike maniere om te sorg dat jou dier nie ly nie:
• Voeg bekostigbare, veilige bykosse soos gekookte stampmielies, pampoen, wortels of pap by gewone kos – dit gee volume én voeding.
• Maak droë brokkies meer geurvol en verteerbaar deur ‘n bietjie warm water of ongegeurde hoenderaftreksel oor te gooi (sonder enige sout, speserye of uie).
• Koop groter sakkies kos in gemeenskapsgroepe of saam met ander – dis gewoonlik goedkoper per kilogram.
• Vra plaaslike dierewelsynsorganisasies of hulle hulp kan bied met kos as jy regtig sukkel.
Winter is moeilik vir almal, maar dit is nog moeiliker vir ‘n dier wat koud én honger is.
